Foto dunha nena

Exposición conmemorativa do centenario da primeira Cátedra de Pedagoxía

MANUEL BARTOLOMÉ COSSÍO

BUSC - Bca. Intercentros de Filosofía, Psicoloxía e CC. da Educación

 
Inicio
Presentación
Vida
Catálogo
Bibliografía
Imaxes

 

Traxectoria vital dun educador

Manuel Bartolomé Cossío naceu en Haro (Logroño) o 22 de febreiro de 1857.

En 1874 rematou a licenciatura de Filosofía e Letras na Universidad de Madrid. Nese mesmo ano coñeceu, como profesor, a D. Francisco Giner de los Ríos.

Ao fundarse a Institución Libre de Enseñanza en 1876, Cossío foi un dos primeiros alumnos e foi nomeado profesor auxiliar da Institución, quedando incorporado á mesma ata o fin da súa vida, como profesor e responsable directivo.

En 1880 foi bolseiro no Colexio San Clemente de Bolonia, para logo visitar diversas cidades de Italia, Francia e Bélxica, onde participou no Congreso Internacional de Ensinanza de Bruxelas. Alí presentouse por primeira vez internacionalmente a Institución Libre de Enseñanza. As viaxes polo estranxeiro, visitando institucións educativas, e a asistencia a congresos internacionais de educación (Madrid, Barcelona, Londres, París, Zurich, San Luis (Estados Unidos))  serán a partir de entón unha constante na vida de Cossío.

Debuxo de Cossío

 

En 1882 gañou por oposición a cátedra de Historia das Belas Artes da Escuela de Barcelona. Na relación de Cossío coa historia da arte salientan, entre outros estudios, a elaboración dunha Historia da pintura española e, fundamentalmente, a publicación, en 1908, da súa magna obra El Greco

En 1883 gañou por oposición a dirección do Museo Pedagógico de Primera Enseñanza (despois Museo Pedagógico Nacional), fundado o ano anterior, e nel permañeceu ata a súa xubilación en febreiro de 1929. A súa concepción dinámica desta institución reflíctese en iniciativas como as bibliotecas e material escolar circulantes ou as colonias escolares de vacacións.

En 1901 encargouselle a cátedra de Pedagogía General, creada no Museo Pedagógico Nacional e, en abril de 1904, foi nomeado catedrático de Pedagoxía superior do doutoramento na Facultad de Filosofía y Letras da Universidad de Madrid

En 1921, como director do Museo Pedagógico, foi nomeado Consejero de Instrucción Pública, cargo que exerceu ata a súa xubilación. A súa influencia na política educativa do seu tempo deixouse xa sentir, así e todo, desde moito antes, debido ao influxo que el e máis Giner exerceron en políticos e responsables educativos de diferentes gobernos

Ao proclamarse a República materializouse un vello soño de Cossío coa fundación, en 1931, das Misións Pedagóxicas, das que sería nomeado presidente do Patronato.

Por causa da doenza que padeceu nos anos seguintes Cossío viviu xa desde unha certa distancia os avatares da República, da que é nomeado “Cidadán de honra” en 1934. O ano seguinte faleceu en Collado Mediano (Madrid).

  Debuxo de Vázquez Díaz, en: Jiménez Landi Martínez, Antoni. Manuel Bartolomé Cossío, una vida ejemplar. Alicante, 1989