O traballo da doutora Calo achega un éxito máis á lista de teses defendidas no CiQUS neste final de ano.
 |
Desde o século pasado véñense estudanto un gran número de moléculas que, pola súa capacidade para unirse selectivamente ao ADN, teñen importantes aplicacións como axentes antitumorais. Non obstante, e malia estes esforzos investigadores, atopar moléculas que se unan ao ADN non semella abondo, polo que un dos maiores retos neste campo está en controlar a súa toxicidade para ser quen de diminuír os efectos secundarios indesexables dos tratamentos de quimioterapia.
Neste contexto, o traballo de tese que a investigadora Renata Calo vén de presentar na Facultade de Química da USC centrouse no estudo de novos axentes antitumorais baseados en fragmentos de proteínas naturais (náis concretamente no factor de transcrición MYC, que se atopa alterado en aproximadamente unha cuarta parte dos tumores—, así coma no uso da luz para controlar de xeito rápido e sinxelo a afinidade dos axentes de unión ao ADN.
Finalmente, a nova doutora explorou tamén a unión química de varios destes axentes de recoñecemento do ADN para xerar novas moléculas que puidesen ter nun futuro aplicacións terapéuticas en enfermidades por expansión de trinucleótidos, como a distrofia miotónica ou a enfermidade de Huntington.