Éxito do CIQUS na convocatoria de proxectos do Programa Estatal de I+D+i Orientada aos Retos da Sociedade

 

O Ministerio de Economía e Competitividade acaba de publicar a proposta de resolución provisional de la convocatoria 2013 de axudas a proxectos de investigación do Programa Estatal de I+D+i Orientada a los Retos de la Sociedad, na que o CIQUS obtivo un notable éxito. Así, foron propostos para o seu financiamento cinco dos seis proxectos presentados por grupos de investigación do CIQUS, por un importe total de 998.367 euros (custos directos), o cal supón un 27,3% do total conseguido pola USC nesta convocatoria. Cabe tamén destacar que catro dos proxectos financiados recibirán adicionalmente un contrato predoutoral asociado ao proxecto.

O programa de I+D+i orientada aos retos da sociedade, que constitúe un dos eixes principais do recente Plan Estatal de I+D+i 2013-2016, identifica as prioridades científico-técnicas e sociais que han de orientar as actividades de investigación básica dos axentes do sistema español de ciencia e tecnoloxía nos próximos anos, sobre a base dos grandes retos da sociedade española: a saúde, o envellecemento, a inclusión dos segmentos máis fráxiles da sociedade, a sostibilidade ambiental, o abastecemento enerxético, a biodiversidade, a transformación dos sistemas políticos sociais e a seguridade dos cidadáns. O financiamento estatal a proxectos de investigación básica compleméntase co Programa Estatal de Fomento da Investigación Científica e Técnica de Excelencia, ao que concorreron tamén varios grupos do CIQUS e cuxa resolución se espera nas próximas semanas.