Investigadores do CIQUS describen por primeira vez o control selectivo, independente e simultáneo, tanto da elongación coma do sentido de xiro dun polímero helicoidal.
Este desenvolvemento de investigadores do CIQUS (Universidade de Santiago de Compostela), foi seleccionado como portada da revista Chemical Science, e ten aplicacións tanto no ámbito dos sensores coma en polímeros intelixentes que responden a diferentes estímulos.
O traballo publicado describe o primeiro exemplo dun polímero helicoidal dinámico que presenta unha nova propiedade: tanto a súa elasticidade (grao de estiramento ou compresión) coma o seu sentido de xiro helicoidal (xiro a esquerda ou a dereita) poden ser alterados á vez de modo selectivo e independente mediante a resposta do material a dúas propiedades do medio en que se encontre disolto (polaridade e carácter dador/aceptor).
Isto quere dicir que un mesmo polímero pode adoptar catro estruturas helicoidais diferentes ao ser estimulado selectivamente para elixir unha determinada configuración: dous sentidos de rotación (dereita/esquerda) e dúas lonxitudes (estirado/comprimido), constituíndo un sensor con catro posibles estados.
O desenvolvemento foi realizado integramente polos investigadores do CIQUS (USC), Seila Leiras (investigadora predoutoral), Félix Freire (Investigador Ramón e Cajal) e José Manuel Seco, pertencentes ao Grupo de Emilio Quiñoá y Ricardo Riguera (este último recentemente premiado por la Real Sociedade Española de Química coa medalla Félix Serratosa).
Esta investigación é a continuación dunha serie de traballos anteriores publicados nas prestixiosas revistas Angewandte Chemie e Journal of the American Chemical Society, enmarcándose nunha liña de traballo enfocada ao desenvolvemento de sensores a partir de polímeros intelixentes capaces de responder a estímulos externos.
O obxectivo final é o desenvolvemento de novos nanomateriais que mediante a combinación nova de distintas propiedades (ópticas, condutoras, magnéticas, encapsulantes...) dean lugar a nanocápsulas e outros nanocompostos con comportamento multifunctional e con aplicacións nos campos das tecnoloxías da información (almacenamento, novas tecnoloxías de visualización, novos biochips…), a óptica (filtros…), a química (novos procesos catalíticos…) e a medicina (sistemas de diagnose…).
Representación das catro estructuras diferentes que se poden obter a partir dun mesmo polímero en función das características físico-químicas do medio no cal se atopa.
Exemplos das estruturas helicoidais, obtidas mediante modelado por mecánica molecular a partir dos datos de microscopía electrónica
