O Centro de Investigación en Química Biolóxica e Materiais Moleculares (CiQUS) acolleu o pasado venres o acto de clausura do ano académico 2024/2025 do Máster en Química na Interface coa Bioloxía e a Ciencia de Materiais (ChemBio&Mat), un programa de posgrao da Universidade de Santiago de Compostela deseñado para formar investigadores en áreas fronteira entre a química, a bioloxía e a ciencia de materiais.
A xornada comezou cunha sesión de pósters científicos onde os estudantes presentaron os resultados dos seus Proxectos de Iniciación á Investigación, desenvolvidos nos grupos do CiQUS. Entre os traballos expostos destacaron o deseño de nanotubos de péptidos cíclicos con actividade antimicrobiana, o estudo fotofísico de complexos de rutenio para reaccións de cicloadición e o desenvolvemento de nanopartículas lipídicas para a liberación controlada de ARNm, que xeraron interesantes debates entre os asistentes.
O peche final púxoo a conferencia maxistral da profesora Luisa De Cola, catedrática da Universidade de Milán e investigadora no Karlsruhe Institute of Technology (Alemaña). Baixo o título "Nanomateriais híbridos intelixentes para aplicacións biomédicas", a experta internacional presentou os últimos avances no desenvolvemento de sistemas de liberación de fármacos selectivos, con especial énfase no uso innovador de vesículas extracelulares para o tratamento dirixido de tumores.
Un máster na vangarda da investigación
O Máster ChemBio&Mat, impartido íntegramente en inglés, proporciona formación especializada en técnicas experimentais e computacionais de vangarda. A formación práctica realízase nos laboratorios do CiQUS, onde os estudantes traballan xunto a equipos de investigación punteiros.
O programa atrae cada ano a un grupo selecto de estudantes con formacións académicas complementarias (química, bioquímica, enxeñaría de materiais) e de diferentes países, creando un entorno de aprendizaxe especialmente enriquecedor para abordar retos científicos complexos. Tras este primeiro ano académico, os alumnos prepáranse agora para completar a fase final do máster, que inclúe a realización dun proxecto de investigación avanzado.
Participantes na cerimonia de clausura do Máster ChemBio&Mat.
Sesión de pósters na cerimonia de clausura do ChemBio&Mat.