O Consello Europeo de Investigación (ERC) anunciou hoxe a concesión de 494 axudas Starting Grant a científicos de toda Europa. O Dr. Ignacio Insua, investigador da Universidade de Santiago de Compostela (USC), recibiu o respaldo deste prestixioso programa que impulsa a investigación de vangarda, apostando por ideas rompedoras e apoiando a mozos investigadores no inicio das súas carreiras.
O proceso de selección destas axudas é moi competitivo e selectivo. Neste caso, presentáronse 3.474 propostas, que foron avaliadas por un comité formado por investigadores de renome internacional. Tan só o 14,2% das propostas foron seleccionadas para recibir financiamento, que contarán con 1.5 millóns de euros para un período de cinco anos.
A investigación do Dr. Insua centrarase na resistencia bacteriana aos antibióticos. O seu proxecto REPLICATE buscará desenvolver antibióticos auto-replicantes, é dicir, capaces de formar copias de si mesmos para amplificar a súa acción antimicrobiana. "Administrando moléculas precursoras totalmente inocuas, estas poden combinarse na membrana de bacterias patógenas, activando así o seu auto-replicación e acción antimicrobiana localmente no foco infeccioso" explica o investigador. Trátase dunha innovadora estratexia para loitar contra a resistencia a antibióticos, un serio problema en auxe a nivel mundial responsable de 1,8 millóns de mortes ao ano, con prognóstico de ser máis letal que o cancro para 2050.
O Dr. Insua, realizou o seu doutoramento en Química pola Universidade de Birmingham, e completou a súa formación postdoutoral no CiQUS, primeiro como investigador Juan de la Cierva e logo como Marie Curie. Actualmente é investigador Ramón y Cajal adscrito ao Departamento de Farmacoloxía, Farmacia e Tecnoloxía Farmacéutica da USC. O galardoado pretende desenvolver o seu proxecto ERC na USC, pois a institución ofrece un excelente contexto de traballo en leste campo fronteira entre a Química e a Bioloxía, segundo as súas propias palabras.
Sobre o ERC
O programa do Consello Europeo de Investigación proporciona financiamento atractivo de longo prazo para apoiar a investigadores excelentes e os seus respectivos equipos. O programa persegue innovacións de alto risco e de alto beneficio en calquera campo de investigación, sendo a excelencia científica o único criterio de avaliación. Deste xeito, espérase que a investigación financiada polo ERC conduza a avances significativos nas fronteiras do coñecemento.
O ERC establece convocatorias cunha periodicidade anual. Existen tres esquemas de subvención individuais (Starting, Consolidator e Advanced Grants), un esquema de subvención para grupos (Synergy Grant) e un esquema (Proof of Concept) para explorar o potencial de comercialización ou social dos resultados obtidos no seo de proxectos ERC.
